Жібек Құламбаева Таиландтағы жарыста жартылай финалдан тыс қалды

Қазақстандық Жібек Құламбаева жұптық сында Нонтхабури (Таиланд) ITF W50 турнирінің жартылай финалына шыға алмады.

Жарыстың 2-ракеткасы болып тіркелген Ж.Құламбаева грекиялық Сапфо Сакелларидимен бірге ширек финалда ресейліктер Екатерина Маклакова – Екатерина Яшинамен ойнады.

Бірінші партияда ресейлік дуэт 6:2 есебімен басым түсті.

Екінші сетте қазақстандық-грекиялық жұп есе қайырды – 6:3. Алайда супер тай-брейкте жеңіс ресейліктердің еншісінде кетті – 10:6.

Осылайша, қазақстандық теннисші үшін Таиландтағы турнир аяқталды. Бұдан бұрын Жібек жекелей сында жапониялық Нахо Сатоға жол берген еді.

Дереккөз: kaz.inform