Еуроға іріктеуде Қазақстанның әйелдер құрамасы Арменияны ұтты

Әйелдер арасында 2025 жылғы Еуропа чемпионатының іріктеу кезеңінде Қазақстан құрамасы Орталық стадионда Арменияны ойсырата ұтты.

Бұған дейін сырт алаңда армениялықтарға 1:2 есебімен есе жіберген қазақстандықтар артығымен қарымта қайырды. Алдымен 28-минутта Камила Құлмағамбетованың бұрыштамадан берген пасынан кейін Александра Бурова есеп ашты. 35-минутта Аида Гайстенова үш ойыншыны қапы қалдырып, тоғыздықты дәл көздеді – 2:0. 39-минутта Армения сапындағы Марал Артин есепті қысқартты. Екінші таймда 57-минутта тағы да бұрыштамадан кейін команда капитаны Бибігүл Нұрышева баспен дәл соқты. Бір минуттан соң Әселхан Тұрлыбекова ойын нүктесін қойды - 4:1.

Осылайша, Қазақстан әйелдер құрамасы алғашқы жеңісіне қол жеткізді. Бұған дейін Мадияр Кембіловтің шәкірттері өз алаңында Болгариядан – 0:1, сыртта Румыниядан – 0:1, Армениядан 1:2 есебімен ұтылып қалған еді.