«Тараз» футбол клубына жаңа директор тағайындалды
Әлімбек Жұмабаев «Тараз» футбол клубының директоры қызметіне тағайындалды.
Жамбыл облыстық дене шынықтыру және спорт басқармасының басшысы Ернар Ибраимов футбол клубының ұжымына жаңа жетекшіні таныстырды.
«Әлімбек Жұмабаев — Жамбыл облыстық футбол федерациясының басшысы. Тағайындау клуб директоры лауазымына жарияланған конкурстың үшінші кезеңінің қорытындысы бойынша жүзеге асты. Әлімбек Жұмабаев бұрын да „Тараз“ футбол клубына басшылық еткен. Жаңа директордың алдына жамбылдық футболды дамыту тапсырмасы қойылды», — деді басқарма басшысы.
52 жастағы Әлімбек Жұмабаев Жамбыл облысында өмірге келген, Қ.А.Яссауи атындағы ХҚТУ-ды бітірген. Шахматтан бапкер болып жұмыс істеген, кейін бизнес саласына ауысқан. Жамбыл облыстық футбол федерациясын 2006 жылдан бері басқарады.