Азиада-2025: қазақстандықтардың нәтижелері

Қытайдың Харбин қаласындағы IX қысқы Азия ойындары өз мәресіне жетті. Жалпы медальдық есепте қытайлықтар бірінші орын алса, қазақстандықтардың да тарихи жетістіктері аз емес. Толығырақ Bigsport.kz материалында. 

Осымен 9 рет өтіп жатқан Азиада аяқталды. Аталмыш турнирге Қазақстан атынан 137 спортшы қатысқан болатын. Ұлттық құрама сноубордты санамағанда 10 спорт түрінен бақ сынады. 

 Жалпы есепте Қытай құрамасы көш бастаса, Қазақстан басты үш бәсекелесінен қалып қойды. Ұлттық құрамамыз жалпы есепте төртінші орынға тұрақтады. Ел қоржынында 4 алтын, 9 күміс және 7 қола медаль бар. 

 Алтын иеленген спортшыларға тоқталсақ. Биатлоннан 10 шақырым қашықтықта Владислав Криеев чемпион атанған еді. Ал екінші болып тағы да Қазақстан құрамасының өкілі Вадим Куралес жетті.

“Барлығы ойдағыдай өтті. Бұл медаль біз үшін маңызды болған. Сондықтан біз дайындығымызды толық көрсетіп, командаласыммен бірге бірінші және екінші орын алдық. 

 Егер жарыс туралы айтсам, бірінші ату айлағында алғашқы оқты нысанаға дәл тигізе алмадым. Қателік жібердім, өйткені дәл сол сәтте жел соғып кетті. Мен түзеуге тырыстым, бірақ сәл жетпей қалды. Бұл сәтті әлі бапкерлермен бірге талдаймыз. Жалпы, бүкіл жарыстағы ең үлкен кемшілігім осы болды деп ойлаймын. Қалғаны өте жақсы өтті. Қатты қалып қоймадым. 

Бапкерлерім жарыс барысында жақсы бағыт-бағдар беріп отырды. Бастапқы екпінім аса жоғары болған жоқ. Бірақ жарысты тым жылдам бастау әрдайым жақсы бола бермейді. Ерте қарқын алып, соңында әлсіреп қалу қаупі бар.

Сондықтан, жарыс басталғаннан кейін орташа қарқынмен жүрдім. Бірінші айналымнан кейін аздап артта келе жаттым. Ату айлағын бір айып айналымымен шықтым. Ол кезде айырмашылық 9 секундтай болды. Бірақ жарыс барысында қарқынды күшейтіп, уақыт айырмасын азайта бастадым. Нәтижесінде, өзіме қажетті жылдамдықты ұстап, алтын медаль иелендім.

Бұл – өте маңызды жарыс, өте маңызды медаль. Тек мен үшін ғана емес, бүкіл Қазақстан үшін, еліміздің спортшылары үшін де. Азия ойындары – Олимпиададан кейінгі ең ірі додалардың бірі. Сондықтан, кез келген жүлде бізге өте қажет, әрі бағалы. Ал біз бірден екі медаль жеңіп алдық – алтын және күміс! Мұндай жетістікке жеткенімізге өте қуаныштымын. Бұл бізге алдағы жарыстарға үлкен сенімділік береді. Бірақ демалуға уақыт жоқ. Келесі жарыс – Әлем чемпионаты, одан кейінгісі – Әлем кубогы кезеңдері. Жалпы, жарыстар жалғаса береді, өйткені Олимпиадаға жолдама алу үшін ұпай жинауымыз керек.

Сондай-ақ, әрдайым өзіңнің командалас әріптесіңмен бірге халықаралық жарыстарда жеңіс  тұғырына көтерілген ерекше қуаныш сыйлайды. Вадимді жүлдесімен құттықтағым келеді. Оның да жеңіс тұғырында тұрғаны тамаша сезім. Себебі, біз бірге жаттығып, көп сәттерді бірге өткеріп жүрміз," – деп бөлісті Киреев, Olympic.kz сайтына берген сұқбатында.

Сондай-ақ, қазақстандық шорт-трекшілер де жеңіс тұғырының биігіне шықты. Спортшыларымыз бұл жарыста үш жүлде жеңіп алды. Ерлер эстафетасында тарихи алтын медальға қол жеткізсе, әйелдер және аралас эстафеталарда күміс жүлде еншіледі. Ұлттық құраманың бас бапкері Петр Гамидов еңбектің ақталғанын айтты. Сонымен қатар араға көп уақыт салмай, Әлем кубогының кезеңдеріне аттанатынын жеткізді.

Фристайл-акробатикадан жүлде күткен едік. Қазақ жанкүйерлерінің арманы орындалды. Синхронды секіруде Шерзод Хаширбаев пен Роман Иванов елге фристайл-акробатикадан алғашқы алтын медальді сыйлады. Айта кетейік, алтын жүлде үшін тартыста олар Қытайдың әлемдік деңгейдегі спортшыларын басып озды.

Шайбалы хоккейден Қазақстан құрамасы Азиядағы хоккейдің көшбасшысы екенін тағы бір мәрте дәлелдеп отыр. Ұлттық құраманың тәжірибелі ойыншыларының бірі Роман Старченко бұл Азиадада басты мақсат - бірінші орынды иелену деген болатын. Нәтижесінде Қазақстан финалда Жапонияны 5:0 есебімен ойсырата жеңді.

Күміс жүлдегерлердің қатарында Евгений Кошкин (конькимен жүгіру спорты), Константин Борцов (шаңғы жарысы), биатлоншы Вадим Куралес, хоккейден Қазақстан әйелдер құрамасы, шаңғы жарысынан әйелдер құрамасы, биатлоннан ерлер командасы және аралас командалар арасындағы фристайлшылар.

Өз кезегінде Евгений Кошкин медальді өзінің бапкеріне арнайтынын жеткізді.

“Медальді мен өзімнің алғашқы бапкеріме, Улитин Николай Георгиевичке арнаймын. Өкінішке қарай ол өткен жылы қайтыс болды. Ол мені осы спортқа алып келді және мені осында болуым үшін барлық жағдайды жасады", - деді Кошкин.

Ал Константин Борцов отбасылық дәстүрді жалғастыра алғанын айтты.

“Ең әсерлісі, менің әкем, менің негізгі жаттықтырушым, Харбиндегі Азия ойындарында медаль жеңіп алған. 30 жылдық цикл… Бұл медаль мен үшін маңызды оқиға. Отбасылық тарихты жалғастырдым. Бұл үшін қуаныштымын", - деп мәлімдеді Константин марапаттау рәсімінен кейін.

Қола медальді Олжас Климин (шаңғы жарысы), конькимен жүгіру спортындағы командалық спринт құрамасы, мәнерлеп сырғанаушы Михаил Шайдоров, шаңғы жарысы бойынша ерлер құрамасы, фристайл-акробатикадан Аяна Жолдас, синхронды секірудегі әйелдер фристайл командасы және биатлон эстафетасындағы әйелдер құрамасы иеленген болатын.  

Дереккөз: ҰОК Сурет: Сали Сабиров, Нұрғали Жұмағазы, ҚР ҰОК баспасөз қызметі