Тағы да жүлдесіз қалдық…
Жарыстың екінші күні аяқталды
Баку қаласында дзюдодан Grand Slam бәсекесі жалғасуда. Бүгін жарыстың екінші күні. Татамиге шыққан Ғайнуллин Аңсарбек (-73 кг) алғашқы белдесуінде жарыс жолын аяқтады. Осы салмақтағы тағы бір отандасымыз Тоқтасын Ислам ширек финалға дейін қарсылас шақ келтірмеді. Дегенмен, жартылай финалға жолдама сарапқа салынған кездесуде тәжікстандық балуан Сомон Махмадбековке есе жіберді. Жұбаныш белдесуінде грузиялық Чихелидзе Исламнан басым түсті. Осылайша, 73 келіге дейінгі салмақ дәрежесінде сынға түскен дзюдошыларымыз жарысты аяқтады.
81 келіге дейінгі салмақ дәрежесінде ел намысын қорғаған Мейіржан Жұмабек мінез танытып, қарсыластарына тегеурін көрсеткен еді. Алайда, бұл балуанымыздың да жолы ширек финалда үзілді. Жарыстың кезекті күні біздің құрама үшін тағы да сәтсіз аяқталды.
Ертең татамиге Ратаев Қуаныш, Хамза Дидар (-90 кг), Бозбаев Ислам, Естай Ермұхан (-100 кг), Қажыбаев Ерасыл (+100 кг) шығады. Дзюдошыларымызға сәттілік тілейміз!