Харбин-2025: шайбалы хоккейден Қазақстан - Жапония арасындағы матчқа алдын ала шолу

2025 жылғы Қысқы Азия ойындары Қытайдың Харбин қаласында өтуде. Жарыс аясында шайбалы хоккейден Қазақстан құрамасы ежелгі қарсыласы Жапониямен кездеседі. Толығырақ BigSport.kz материалында. 

Шайбалы хоккейден Жапония құрамасын Қазақстанның ежелгі қарсыласы десек қате болмас. Екі құрама бұған дейін өзара 21 матч өткізген. Статистикаға үңілсек Қазақстан ерлер құрамасы 15 рет қарсыласын тасада қалдырған. Сондай-ақ үш рет тең ойнап, үш рет жеңіліс тапқан.  

Алғашқы матчтар сонау 1993 жылы өткен. Бұл кездесулер Қазақстан құрамасының оқу-жаттығу турында өтті. Нәтижесінде 9:2 есебімен және екі мәрте 3:1 есебімен қазақстандықтар қарсыласынан басым түскен. 

Алғашқы 1996 жылғы қысқа Азия ойындарында Жапония құрамасын атақты Дэйв Кинг бастап барған болатын. Алайда бұл жағдай Қазақстан құрамасы үшін кедергі болмады. Отандастарымыз 4:1 есебімен жеңген. 

Ал 1999 өткен Азия ойындарында жапониялықтар мықтылық танытты. Матчтың қорытынды есебі - 1:1. Тең ойын Жапония құрамасының әлеуетін ашса керек, Хачинохта өткен Азиадада Қазақстан құрамасын 2:7 есебімен ойсырата жеңген. Дәл осы матчтан кейін Қазақстан және Жапония құрамаларының кездесулері ерекше маңызға ие болған. 

Келесі матч 2007 жылғы Қысқы Азия ойындарында өткен. Жапония құрамасы басымдығын жоғалтқан жоқ. Нәтижесінде жапониялықтар 3:2 есебімен жеңген. Қазақстандық хоккейшілер бұл кеткен есені 2009 жылы Литвада өткен әлем чемпионатында қайтара алды. 

Ұлттық құрама 3:1 есебімен басымдық танытты. Қазақстандық жанкүйерлер үшін ең есте қаларлық матчтардың бірі 2011 жылы болды. Сол жылы Азиада алғаш рет Қазақстан жерінде өткен. Жанкүйерлерге лық толы “Қазақстан” спорт сарайында өткен матчта ұлттық құрама 4:1 есебімен маңызды жеңіске қол жеткізген болатын.  

Кейінірек әлем чемпионатының бірінші дивизионында 2013 жылы және 2015 жылы матчтар өткен еді. 2013 жылы Қазақстан құрамасы 2:1 есебімен жеңіліп жатып, камбэк жасай білді. Қорытынды есеп 2:5 қазақстандықтардың пайдасына. Ал 2015 жылы өткен ойында жапониялықтарға еш мүмкіндік қалдырмай 7:2 есебімен ойсырата ұтқан. 2017 жылы өткен Азия ойындарында ұлттық құрама Жапонияның қақпасына жауапсыз жеті гол соқты. Қазіргі Жапония құрамасының әлеуетіне келер болсақ. 2023 жылғы әлем чемпионатында сәтті өнер көрсетіп, бірінші дивизионның В тобында жеңімпаз атанған. 2024 жылы Алматыда өткен соңғы Азия чемпионатында да жақсы нәтиже көрсетті. Дей тұрғанмен, Қазақстан құрамасына 5:1 есебімен есе жіберді. Дәл солай жапониялықтар екінші орынды иеленген еді. 

Бүгінде Қытайдың Харбин қаласында 2025 жылғы Қысқы Азия ойындары өтіп жатыр. Қазақстан және Жапония құрамалары А тобында өнер көрсетуде. Қазақстан құрамасы осыған дейін Таиландты 12:0 жеңсе, жапониялықтар Қытайлық Тайбэйді 15:0, ал Таиланд құрамасын 8:1 есебімен ойсырата жеңген. Айта кетейік, Қазақстан - Жапония арасындағы ойын 8 ақпан күні өтеді. Тікелей көрсетілім Qazsport телеарнасында қолжетімді.