Сәкен Бибосынов Италиядағы турнир жайлы ойын айтты

Қазақстандық бкосшы Сәкен Бибосынов Италияда өткен Олимпиадаға іріктеу турнирі жайлы ойын айтты, деп жазады Olympic.kz.

Бибосынов Бусто-Арсициода сәтті өнер көрсетіп, Париж Олимпиадасына жолдама алып отыр. Бұған дейін 26 жастағы боксшы Токиодағы жазғы ойындарда қола жүлде иеленген еді.

"Менің ең басты мақсатым - ел намысын абыроймен қорғап, лицензияға қол жеткізу болатын. Мақсатыма жеткеніме қуаныштымын. Бұл - ұзын жолдың басы ғана. Алда бізді ең үлкен жауапкершілік, ең маңызды міндеттер күтіп тұр. Париж Олимпиадасында Токиодағы қателіктерді жөндеуге тырысамын. Енді жаттығуды үдете түсеміз. Ал лицензиялық турнирге келер болсақ, барлық қарсыласыма қарқынды дайындалдым. Лицензия алатыныма сенімді болдым. Жекпе-жектердің ішінде ең соңғы, шешуші кездесу сәл қиындау соқты. Десе де, жолдамаға қол жеткізсем деген ойым орындалды", - дейді Бибосынов.