Шетелдіктермен қош айтысты. "Барысқа" жаңа директор мен бапкер келді
Астананың "Барыс" хоккей клубына бас директор мен бас бапкер тағайындалды. Сондай-ақ, клуб шетелдік легионерлермен келісімшартын мерзімінен ерте аяқтап жатыр.
"Туризм және спорт индустриясын қолдау қоры" корпоративтік қорының шешімімен Нұрлан Оразбаев "Барыстың" бас директоры болып тағайындалды. Маман клубты 2006-2012 және 2013-2015 жылдары да басқарған.
Командада бас жаттықтырушы қызметіне Ғалым Мәмбеталиев келді. Ал бұған дейін команда тізгінін ұстап келген ресейлік Вячеслав Буцаев көмекші қызметін атқарады.
"Трансферы КХЛ. Хоккей" телеграм арнасының хабарлауы бойынша, елордалық команда шетелдік легионерлермен келісімшартын мерзімінен бұрын аяқтауда. Бұл туралы команда әлі ресми ақпарат жарияламады.
"Барыс" жаңа маусымды сәтсіз бастады. 16 ойынның 13-де ұтылып, Шығыс конференцияда соңғы орында тұр. Келесі ойынын 19 қазан күні Ярославльде "Локомотивке" қарсы өткізеді.