Шахматтан Азия чемпионы өмірден өтті

Павлодарлық шахматшы Валентин Захаров 75 жасында қайтыс болды. 

Валентин Захаров Павлодардың құрметті азаматы және шахматтан халықаралық дәрежедегі шебер болған.

"Ол тамаша жолдас, терең ойлы адам, бірнеше буын шәкірт тәрбиелеген сезімтал тәлімгер және жаттықтырушы болды. Жақындары мен туыстарына қайғырып, көңіл айтамыз", – деп жазды Қазақстан шахмат федерациясы.

Павлодар қаласы әкімдігінің ресми сайтындағы ақпаратқа сүйенсек, Валентин Захаров 1989 жылы шахматтан Азия чемпионы атағын жеңіп алған. Командасымен бірге Малайзиядағы әлемдік клубтар чемпионатында бірінші орын иеленген.

Захаров Павлодар шахмат үйінде жаттықтырушы болып та қызмет атқарған. Шахматшының шәкірттерінің ішінде сеньорлар арасындағы әлем чемпиондары, Азия чемпиондары, гроссмейстерлер, шахматтан Азия олимпиадасының жүлдегерлері, халықаралық дәрежедегі спорт шеберлері, спорт шеберіне үміткерлер бар.

Дереккөз: nur.kz