Бокс федерациясында Олимпиададан кейінгі халықаралық турнирге кімдер қатысатынын айтты
Бокстан ұлттық құраманың үздіктері Шымкентте өтетін Қарақозы Әбдәлиевті еске алуға арналған халықаралық турнирде бақ сынайды. Осымен 43-рет өткізілетін бәсеке биыл бас команданың көшбасшыларынан бөлек, шетелдік былғары қолғап шеберлерінің де басын қоспақ.
«Асыланбек Шымбергенов осы жаттығу жиынына денсаулығына байланысты қатыса алмады. Сондықтан, Әбдәлиев турниріне де үлгермейтін шығар. Қазақстан біріншілігіне қарай дайын болады деген ойымыз бар. Ол мансабына қатысты ешқандай мәлімдеме жасаған жоқ. Сол себепті, Шымбергенов ұлттық құрамада қалатынын айтқым келеді.
Сондай-ақ, Қамшыбек Қоңқабаев (+92 келі) пен Нұрбек Оралбай (80 келі) да бұл турнирден сырт қалады.
71 келіде кәсіби бокстағы өкіліміз Абылайхан Жүсіпов құрамаға қайта оралды. Спортшымыз бұл турнирге қарқынды дайындалуда. Жақында команда капитаны болып сайланған Айбек Оралбай аса ауыр салмаққа ауысты. Айбекті осы салмаққа бейімдей берсек деген ойымыз бар. Махмұд Сабырхан 54 келіде, Сәкен Бибосынов 51 келіде жұдырықтасады.
Әлем чемпионатынан кейін көп жарыстан сырт қалған Санжар Тәшкенбай да сапта. Қазақстан командасының төртінші құрамына дейін бұл жарыста бақ сынайды.
Алғашқы екі орын иеленгендер әрі қарай жаттығу жиындарына қатысып, содан соң Азия біріншілігіне баратын құрамды жасақтаймыз. Бізге Азия чемпионатына қатысқан соң, тек жеңіске жету керек», - деді Қазақстан бокс федерациясының Атқарушы директоры Рауан Игенев.