Қазақстандық ағайынды теннисшілер Еуропаның ең мықты лигаларының біріне өтеді
Үстел теннисінен Қазақстан командасының өкілдері, ағайынды Дастан мен Айдос Кенжеғұловтар жаңа маусымды Аустрияның Badener AC ( Баден қаласы) және UTTC Panaceo Stockerau (Штоккерау қаласы) клубтарында бастайды, деп хабарлайды Olympic.kz.
«2018-2022 жылдар аралығында мен Badener клубында ойнадым. Сол кездерден жылы естелік қалды. Араға екі жыл салып, ағаммен бірге Еуропаның ең мықты лигаларының біріне қайта жолдама алдық», - дейді Айдос.
Дастанның айтуынша, ол 2023 жылы өткен жаттығу жиынында австриялық клуб менеджерлерінің көзіне түскен.
«Аустриядағы оқу-жаттығу жиынында менеджерлер мені байқаған. Содан кейін келісімшартқа қол қойып, бір маусымды сәтті өткіздім. Биыл келісімді тағы созды. Айдоспен бір чемпионатта ойнайтыныма қуаныштымын», - дейді Дастан.