Өмірзақ Шөкеев үш жыл бұрын сыйға тартқан пәтерді Сәкен Бибосынов әліге дейін ала алмай жүр
Бокстан Токио олимпиадасының қола жүлдегері, әлем чемпионы Сәкен Бибосынов Түркістан қаласында өзіне берілген 2 бөлмелі пәтерді әлі күнге өз атына рәсімдей алмай жүр. Бұл туралы боксшы «Бірінші бол» тілшісіне берген сұхбатында айтында айтты.
Токио Олимпиадасынан кейін елге оралған боксшыға сол кездегі облыс әкімі Өмірзақ Шөкеев салтанатты түрде 2 бөлмелі пәтер берген. Алайда, Олимпиада жүлдегеріне заңмен бекітілген баспана жеке атына емес, тек жалдау құқығымен беріліпті. Ал жауапты мамандар танымал спортшыны әлі күнге құрғақ уәдемен «тойдырып» келеді.
«Токио Олимпиадасы мен әлем чемпионатынан кейін маған Түркістан қаласынан 2 бөлмелі пәтер берді. Алайда, ол жалдау құқығымен рәсімделді. Ал, ол келісім 2022 жылдың соңында аяқталды. Жалпы, әлем чемпионы болған өзге өңірдің спортшыларына 3 бөлмелі пәтер беріліп жатқанда, жалдамалы пәтерде жүргенім жаныма батады. Облыс әкімі болған Өмірзақ Шөкеев қызметінен кетті. Қазіргі әкіммен бұл мәселе туралы сөйлескен жоқпын. Дегенмен, облыстық спорт басқармасы әлі уәде берумен келеді. Бапкерім Мырзағали Айтжанов бұл жағдайдан хабардар. Бірақ ол кісіні бұл жайтқа кірістірімедім. Таяуда спорт қорының басшысы Азамат Қаршығаевқа бұл жағдайды айттым. Олар хат жазып, мәселені шешімін табуға көмектесеміз деп отыр. Ал, қазір келіп менен пәтерді босат десе, мен ештеңе істей алмаймын. Себебі, берілген үйді мен атыма рәсімдей алмаймын», - деді әлем чемпионы.
Сәкен Бибосынов бұл жағдайды айта-айта жергілікті билікке әбден көңілі қалған. Себебі, әкімдік маңындағылар танымал спортшыны жайдары қарсы алғанымен, «қатырамыз» деген сөзбен жылы шығарып салудан шаршаған емес.
«Токио олимпиадасында Түркістан облысы бойынша мен жалғыз жүлдегер атанған спортшы болдым. Ал облыс жұрты мені қуана қарсы алып, әкімдіктегілер сол кезде уәдені берді. Көп күттірмей баспана да берді. Әрине, үйлі болғанға бәрі қуанады. Алайда менің қуанымның соңы уайымға ұласты. Себебі, рәсімдеу заң бойынша мүмкін емес. Тіпті Түркістан облысынан Олимпиада жүлдегеріне мәрттік танытатын еш кәсіпкер болмағаны да өкінішті. Әрине, менде үміт жоқ емес. Бірақ, жай ғана жарыстан орын алып келген спортшыға үй беріп жатқанда, менің жағдайым облыс үшін өте ұят нәрсе деп ойлаймын», - деді Сәкен Бибосынов.
Сәкен Бибосынов ендігі жерде БАҚ өкілдері мен Спорт қорынан үміт күтетінін алға тартты. Токио олимпиадасынан кейін араға 3 жылдан астам уақыт өтсе де, берілген баспананың жыры әлі ұзаққа созылатын секілді…
Дереккөз: 1bol.kz