2024 Париж Олимпиадасы
Бокстан Қазақстан құрамасының капитаны Олимпиададағы бірінші айқаста жеңілді
Sports.kz
Париж Олимпиадасының ашылу салтанатында Қазақстанның туын көтеріп шыққан Асланбек Шымбергенов алғашқы жекпе-жегін өткізді. Йорданиялық Зейяд Ишаишқа қарсы жекпе-жекте жеңіске жете алмады.
Бірінші раундтан бастап қарсыласы бірінші нөмірмен жұдырықтасуға ұмтылды. Асланбек қорғана жүріп, қарсыласының қателігін ұтымды пайдаланумен болды. Ал екінші раундты Зейяд ширақ бастады. Бірнеше соққысын дәл тигізді. Үшінші раундта да Зейяд алға ұмтылумен болды. Асланбек аянып қалмады, шабуылын үдете түскен еді. Үш раунд нәтижесінде төрешілер 3:2 есебімен жеңісті қарсыласына сыйлады.
Айта кетейік, бұған дейін бірінші жекпе-жектерін өткізген Мұхаммедсабыр Базарбайұлы мен Айбек Оралбай қарсыластарын жеңіп шыққан болатын.