Путинцева Бирмингемдегі WTA 250 турнирінің чемпионы атанды

Қазақстандық теннисші Юлия Путинцева Бирмингемдегі (Ұлыбритания) WTA 250 турнирінің чемпионы атанды.

Қазақстандық теннисші финалда дүниежүзілік рейтингіде 190-орында тұрған аустралиялық Айла Томляновичті 6:1, 7:6 (10:8) есебімен ұтты. Бір сағат 27 минутқа созылған матчта Путинцева 4 эйспен бірге 9 брейк-пойнттың бесеуін пайдаланды. Томлянович 4 эйс, 2 брейкпен шектелді.

Осылайша, Юлия Путинцева алғаш рет көгал төсенішіндегі WTA жарысында топ жарды. Бұған дейін ол 2019 жылы Нюрнберг, 2022 жылы Будапешт додасында жеңімпаз атанған еді.

Енді Путинцева Бад-Хомбург WTA 500 турниріне қатыспақ.